دوای وەرگرتنی ئەرکی ڕاهێنەرایەتی یانەی نەفتی میسان بۆ خولی ئەستێرەکانی عێڕاق، عەباس عوبێد و حەبیب جعفر دەستیان لە کار کێشایەوە.
دوای تەنها دوو یاری لە خولی ئەستێرەکانی عێڕاق عەباس عوبێد ی ڕاهێنەر و حەبیب جەعفەری یاریدەدەری وازیان لە ئەرکەکەیان هێنا، وازهێنانی ڕاهێنەر و یاریدەدەری دەگەڕێتەوە بۆ ئەوەی کە هەر دووکیان لە سەر وەزارەتی نەفت فەرمانبەری فەرمین بۆیە نابێت لە یانەی نەفتی میسان مووچەی دووەم وەربگرن یاخود بڕی گرێبەست وەربگرن، دەبێ بە هەمان مووچەی فەرمانبەری خۆیان ڕاهێنەرایەتی لە یانە نەفتیەکانی عێڕاق بکەن و وەزارەتی نەفت ڕەتی کردەوە گرێبەستەکانیان پەسەند بکات، ڕاهێنەرەکانیش ڕازی نەبوونە بەم فەرمانە و بۆیە وازیان لە ئەرکەکەیان هێنا،ئەم دەستلەکارکێشانەوەیە بە خێراترین دەستلەکارکێشانەوە دادەنرێت لە خولی ئەستێرەکانی عێڕاق.
لە دوو یاری ڕابردوو بە سەرپەرشتی عەباس عوبێد یانەی نەفتی میسان بە ئەنجامی 3 _ 0 بە یانەی شوڕتە دۆڕا و لەگەڵ یانەی نەفتیش بەبێ گۆڵ یەکسان بوو.
