لە پەڕەی تایبەتی یانەی هەولێردا هاتووە کەوا بە هۆی ئەو ڕەفتارەی لە یاری نێوان هەولێر و کارەبا نواندی، یانەکە یاریزان عەلی شاخەوانی سزادا.
دوای کۆتایی هاتنی یاری نێوان هەولێر و کارەبا لە گەڕی سێیەمی خولی ئەستێرەکانی عێڕاق کە تیایدا یانەی هەولێر براوە بوو، یاریزان و کاپتنی یانەکە شێرکۆ کەریم داوا لە یاریزان عەلی شاخەوان دەکات بێتە بەرامبەر هاندەران و چەپڵەیان بۆ لێبدات، بەڵام عەلی ڕەتی دەکاتەوە ئەم کارە بکات و بەو هۆیەوە دەمەقاڵێ لە نێوان هەر دوو یاریزان دروست دەبێت و شێرکۆ بە توڕەیی یەوە یاریگا بەجێدەهێڵێت، بۆیە یانەی هەولێر کەمێک لە مەوبەر ڕایگەیاند کەوا یاریزان عەلی شاخەوان بە بڕی 1 ملیۆن دینار سزادراوە، ڕاگەیەنراوەکە دەڵێت :
بەهۆی ئەو هەڵسوکەوتەی کە یاریزان (عەلی شاخەوان) لە یاری نێوان یانەکەمان و یانەی کارەبا، لە خولی ئەستێرەکانی عێڕاق نیشانیدا، دەستەی کارگێڕی یانەکەمان، بڕیاریدا بە پێبژاردنی بڕی (1,000,000) یەك ملیۆن دینار بە یاریزانی ناوبراو .
هەفتەی ڕابردووش کارگێڕی یانەی هەولێر ئەحمەد ڕێبواری گۆڵپارێزی تیپی خولی کوردستانی بە بڕی 5 ملیۆن دینار سزادا بە هۆی ئەوەی لەگەڵ یاریزانێکی هاوتیمی لە نێو یاریگادا بو بە شەڕیان.
