کەمێک لە مەوبەر دەربارەی دۆخی یانەکەی دکتۆر عەبدوڵا سەرۆکی یانەی دهۆک ڕاگەیەنراوێکی بڵاو کردەوە.
سەرۆکی یانەی دهۆک سەرەتا سوپاسی سەرۆکی حکومەت و پارێزگاری دهۆکی کرد لە پای هاوکاری کردنی یانەکە لە وەرزی ڕابردووی خولی نایابی عێڕاق و گوتیشی حکومەت و پارێزگار بۆ ساڵی داهاتووش بەڵێنی پاڵپشتی یانەکەیان داوە، هەروەها سوپاسی تایبەتی هاندەران و پشتیوانانی یانەکەی کرد و داوای کرد بۆ وەرزی داهاتوو بە هەمان ڕۆحیەت هانی تیپەکە بدەن.
دکتۆرعەبدوڵا هەواڵی خۆش و مژدەبەخشی بە جەماوەری یانەکە ڕاگەیاند و گوتی ( دەربارەی خولی پڕۆلیگ تا ئاستێکی بەرز یاریگا کەمان ئامادەیە و هەر کێشەیەکیش هەبێت لەم ماوەیە چارەسەری دەکەین، هەواڵێکی خۆش بە هاندەرانمان ڕادەگەیەنین پێیان دەڵێین گرێبەستی سێ یاریزانی پیشەگەرمان نوێکردۆتەوە ئەوانیش هەریەک لە یانیک زاکیری یاریزانی هێلی ناوەڕاست و هەر دوو یاریزانی دڵی بەرگری نورسۆلێ و مۆزیس لۆکاسن، زۆربەی یاریزانەکانی تر بە کورد و عەرەبەکانەوە گرێبەستی دوو ساڵیان لەگەڵ ئێمە هەیە، بۆیە ناوتوانن بە ئاسانی یانەکە جێبهێڵن و لە ڕۆژانی داهاتوو گفتوگۆ دەکەین لەگەڵ چەند یاریزانێک بە مەبەستی مانەوەیان لە ڕیزی تیپەکە، هەروەها چەند یاڕیزانێکی بە توانا دەهێنینە یانەکە تاوەکو بتوانین ساڵی داهاتوو پێکهاتەیەکی بەهێزتر دروست بکەین، بە هاوکاری و پاڵپشتی سەرۆکی حکومەت و پارێزگاری دهۆک و خەمخۆرانی شارەکەمان، لە وەرزی داهاتوو بەشداری خولی لاوانی عێڕاق و تازەپێگەیشتووانی عێڕاق دەکەین، پار ساڵ بەهۆی سەرکەوتنمان بۆ لە خولی یانە پلە یەکەکانەوە بۆ ڕیزی نایاب دەرفەت نەبوو باشتر خۆمان ڕێکبخەین بە هۆی کەمی ماوەی نێوان هەر دوو خول، بەڵام ئەم وەرزە هەوڵدەدەین ناوی دهۆک ژمارەیەکی قوڕس بێت لە خولی پڕۆلیگی عێڕاقی)
بە ڕاهێنەرایەتی سلێمان ڕەمەزان یانەی دهۆک وەرزی ڕابردووی خولی نایابی عێڕاقی لە ڕیزبەندی دوانزەم بە 50 خاڵ کۆتایی پێهێنا.
