دوای ئەوەی ڕۆژی سێشەممە ی ڕابردوو یانەی شوڕتە قەلغانی خولی نایابی عێڕاقی بەرز کردەوە، بە ئەنجامدانی چەند یاریەک ئەمڕۆ گەڕی 38ـی خولی نایابی عێڕاق ئەنجامدەدرێت.
یانەی دهۆك لە دوا یاری خۆیدا لەم وەرزە، لە شاری بەغداد و تایبەت لە یاریگای زەوڕا دەبێتە میوانی یانەی زەوڕا، یاریەکە بۆ یانەی زەوڕا گرنگیەکی ئەوتۆی نیه و پلەی سێیەمی خولەکەی مسۆگەر کردووە کە خاوەنی 67 خاڵە، بەڵام سەرکەوتنی یانەی دهۆک ڕەنگە چەند پلەیەک بەرەو سەرەوە هەنگاو بنێت کە ئێستا یانەکە بە 49 خاڵ لە پلەی دوانزەم دێت، یاریەکەش کاتژمێر 7:15 خولەکی ئێوارە بەڕێوە دەچێت.
یانەی نەورۆز لە نێو یاریگای مەلعەبەکە لە شاری سلێمانی و کاتژمێر 5ـی ئێوارە ڕووبەڕووی یانەی قوەی جەوی دەبێتەوە، قوەی جەوی بە 75 خاڵ پلەی دووەمی خولەکەی مسۆگەر کردووە و بۆ بەشداریکردن لە پاڵەوانیەتی یانە پاڵەوانەکانی ئاسیا بەشداری لە پاڵاوتن دەکات و بڕیاریشە بە فەرمی داوابکات کەوا یاریەکانی لە یاریگای فرانسۆهەریری لە شاری هەولێر بەڕێوەبچێت، یانەی نەورۆز لە سێ یاری ڕابردوویدا بەبێ یاریزانە پیشەگەرەکانی دوو سەرکەوتن و شکستێکی هەیە، ئەمڕۆش بە هیوای ئەوەی بە سەرکەوتن کۆتایی بە خولی نایابی عێڕاق بێنن دێنەوە نێو یاریگاوە، لەم یایەشدا هەریەک لە یاریزان دیاریاخی و حوسێن عەبدولواحید و ئیبراهیم غازی و حوسێن عەباس و ئەحمەدخالید بە هۆکاری پێکان و سێ کارتی زەردەوە ناتوانن بەشداری یاریەکە بکەن، نەورۆز ئێستا بە 51 خاڵ لە پلەی نۆیەمی خولی نایابی عێڕاق دێت.
