خولی نایابی عێڕاق بەرەو کۆتایی هەنگاو دەنێت و یانەی شوڕتەش نزیکە بۆ دووەم جار لە سەریەک ببێتە پاڵەوانی خولەکە.
ئەمڕۆ یەکشەممە گەڕی 36ـی خولی نایابی عێڕاق بە یاری نێوان نەفتی میسان و دهۆک لە یاریگای میسانی ئۆڵۆمپی کاتژمێر 6ـی ئێوارە دەستپێدەکات،یانەی دهۆک بە 48 خاڵ لە پلەی دەیەمە و نەفتی میسانیش بە 47 خاڵ لە پلەی یازدەم دێت.
لە یاریگای زاخۆ سبەی دووشەممە کاتژمێر 7ـی ئێوارە لە یاریەکی بەهێزدا، یانەی تەڵەبە دەبێتە میوانی یانەی زاخۆ، تەڵەبە 59خاڵی هەیە لە پلەی چوارەمە و یانەی زاخۆش بە 40 خاڵ لە پلەی چواردەم دێت.
لە شاری سلێمانی و تایبەت لە یاریگای مەلعەبەکە، هەر دوو یانەی نەورۆز و هەولێر ڕووبەڕووی یەکتر دەبنەوە، نەورۆز بەبێ پێنج یاریزانە پیشەگەرەکەی هەفتەی ڕابردوو بە دووگۆڵی بێ بەرامبەر لە یانەی نەفتی ناوەڕاستی بردەوە، هەولێریش ئێستا لە بەرزترین ئاستی خۆیدایە بۆیە چاوەڕوانی یاریەکی بەهێز و پڕ جەماوەری دەکرێت، لە مێژوودا هەر دوو یانە سێ جار لە خولی نایابی عێڕاقدا بەرامبەر یەکتر یاریان کردووە، هەریەکە و بردنەوەیەکیان بە دەستهێناوە و لە یاریەکیش یەکسان بوونە، یانەی هەولێر بە 52 خاڵ لە ڕیزبەندی حەفتەم دێت و نەورۆزیش بە 48 خاڵ پلەی نۆیەمی خولەکەی گرتووە.
بەبردنەوەی یانەی شوڕتە بەرامبەر یانەی کارەبا لەم گەڕەی خولی نایابی عێڕاق، ئەوا لە دوو یاری داهاتوو یانەی شوڕتە تەنها پێویستی بەیەک خاڵ دەبێت بۆ ئەوەی بۆ دووەم وەرز لە سەر یەک ببێتە پاڵەوانی خولەکە.
