فلیک باسی هۆکارەکانی درەوشانەوەی یامال دەکات

یاریگا –

هانزی فلیک، راهێنەری بارسێلۆنا ستایشێکی زۆری لامین یامال، دوای ئەوەی سەرکردایەتی بلوگرانای کرد، بۆ بردنەوە لە جیڕۆنا 4-1.

یامال دوو گۆڵی لە یارییەکەدا کرد و هەریەکە لە دانی ئۆلمۆ و پێدری، دوو گۆڵەکەی دیکەی بارسێلۆنایان کرد، درێژەیان بە بردنەوە یەک لە دوای یەکەکانی بارسا لەم وەرزەدا دا.

فلیک لە دوای یارییەکە بە تۆڕی Movistar+ راگەیاند

بە دوو گۆڵەکەی یامال زۆر دڵخۆشم، زۆر گەنجە بەڵام زۆر سەرسووڕهێنەرە، بەم تەمەنە بچووکەوە جیاوازی دروستدەکات. بوونی یامال، کلیلێکی زۆر سەرەکییە بۆ ئێمە، چونکە کوالێتی زۆر بەرزە و زۆر فشاریش دروستدەکات. یامال بریتییە لە کۆکردنەوەی بەهرە و فشار، ئەمەش زۆر یەکلاییکەرەوەیە بۆ ئێمە.

بارسێلۆنا بەکۆکردنەوەی 15 خاڵ لە پێشەنگایەتی لالیگادا دێت، چوار خاڵ لە پێشەوەی ریال مەدرید، ئاتلێتیکۆ مەدرید و ڤیاڕیالە.

بارسا تۆڵەی دوو دۆڕانەکەی وەرزی رابردووی لە جیڕۆنا کردەوە، ئەمجارە بارسا ئامادەکاری بۆ رووبەڕووبوونەوەی مۆناکۆ لە گەڕی یەکەمی قۆناخی خولی چامپیۆنزلیگ دەکات، بڕیارە پێنجشەممە بەڕێوەبچێت.