یاریزانانی یانەی برایەتی بەهۆی دواکەوتنی شایستە داراییەکانیان بایکۆتی مەشق و راهێنانەکانی یانەکەیان کرد.
سەرچاوەیەک لەناو دەستەی کارگێڕی یانەی برایەتی بە تۆڕی وەرزشی یاریگای راگەیاند، یاریزانانی یانەی برایەتی بەهۆی دواکەوتنی شایستە داراییەکانیان، بایکۆتی مەشق و راهێنانەکانیان یانەکەیان کردووە و ئامادە نین دەست بە راهێنانەکانیان بکەنەوە تاوەکو شایستە داراییەکانیان پێنەدرێت.
وابڕیارە سبەی پێنجشەممە کاتژمێر 14:00 لە گەڕی چوارەمی خولی نایابی کوردستان، برایەتی لە یاریگای خۆی لە هەولێر میوانداریی سەیدسادق بکات، بەگوێرەی زانیارییەکانی تۆڕی وەرزشی یاریگا، یاریزانەکان بۆ ئەو یارییە ئامادە دەبن، بایکۆتەکەیان یارییەکان ناگرێتەوە تەنیا بایکۆتی راهێنانەکانیان کردووە.
https://www.facebook.com/Brayatisportclub/posts/pfbid023p5wjijyitkWtvM8HarubMDYuwDch7KaCtsSVqPyHmCcGgsYqogpKFmJvCr6XoHpl
یاریزانانی یانەی برایەتی لەوەتەی دەستیان بە ئامادەکارییەکانیان بۆ وەرزی نوێی خولی نایابی کوردستان کردووە، تەنیا مووچەیەکیان وەرگرتووە و تاوەکو ئێستاش بەشی یەکەمی بڕی پارەی گرێبەستەکانیان پێنەدراوە، پێشتر رۆژی 14ی نۆڤێمبەریان کردبووە دوا مۆڵەت بۆ یانەکەیان بۆ ئەوەی داواکارییەکانیان جێبەجێ بکەن.
برایەتی لەم وەرزەی خولی نایابی کوردستان بە کۆکردنەوەی سێ خاڵ لە سێ یاریدا لە پلەی چواردەمی ریزبەندیی دێت.
