یەکێتی تۆپی پێی کوردستان ئەمڕۆ بڕیاریدا، هەر یانەیەک لە پێشکەوتووانی خولەکانی کوردستان بەشداری نەکات، مافی بەشداریکردنی لە خولەکانی ژێر20ساڵان و ژێر 18 ساڵانی کوردستانی نیە.
ئەمڕۆ شەممە 11/11/2023 بە ئامادەبوونی سەرۆک و جێگر و سەرجەم ئەندامەکانی، یەکێتی تۆپی پێی کوردستان کۆبوونەوەی ئاسایی خۆی ئەنجامدا، لە کۆبوونەوەکە بڕیاردرا هەر یانەیەک بەشداری پێشکەوتووانی خولەکانی کوردستان نەکات ئەوا ناتوانێ بەشداری خولەکانی ژێر20ساڵان و 18ساڵانی خولەکانی کوردستان بکات، بەمەش یانەی پێشمەرگەی سلێمانی کە پلەی دووەمی وەرزی ڕابردووی ژێر20ساڵانی بەدەستهێنا و هەمیشە ژمارەیەکی قورس بوون لە خولەکانی ژێر20ساڵان و 18ساڵان، ناتوانێ بەشداری بکاتەوە بەهۆی ئەوەی پێشکەوتووانی یانەکە ماوەی چوار وەرزە هیچ بەشدایەک لە خولەکانی کوردستاندا ناکەن، یەکێتی تۆپی پێی کوردستان چەندین بڕیاری تری دەرکرد کە تیایدا هاتووە:
1_ هەریانەیەک لە سەر ئاستی پێشکەوتوان بەشداری خولەکانی کوردستان نەکات، ناتوانێ بەشداری لە خولی ژێر 20 ساڵان و خولی ژێر 18 ساڵانی کوردستان بکات.
2_ بە مەبەستی کۆبوونەوە لەگەڵیان، شەممەی داهاتوو 2023/11/18 کاتژمێر 11ـی پێش نوێنەری فێرگەکانی کوردستان لە بارەگای یەکێتی تۆپی پێی کوردستان ئامادەبن.
3 _ کەمکردنەوەی سزای ڕاهێنەری یانەی برایەتی هێور مستەفا بۆ 4 یاری.
4_ بە هۆی لێدانی جەستەیی لە یاریزانێکی تیپەکەی خۆیان، گۆڵپارێزی یانەی هەولێر ئەحمەد ڕێبوار بۆ ماوەی یەک وەرز لە یاری کردن ڕاگیرا و پێبژاردنی بە بڕی 1000000 یەک ملیۆن دینار.
