یاریگا –
رۆدریگۆ گۆس، ئەستێرەی بەڕازیلی یانەی ریال مەدرید دەڵێت، هیچ زانیارییەکی لەسەر پەیوەندیکردنی کیلیان ئێمباپێ بە یانەکەییەوە نییە.
ئەم هاوینە بە گشتی ئێمباپێ بووەتە بابەتی سەرەکی هەموو هەواڵەکانی بابەتی بازاڕی گواستنەوە و چەندین جاریش لە تەنیشت ناوی ریال مەدرید ناوی ئەو یاریزانە باس دەکرێت.
ئێمباپێ رایگەیاندووە کە بەنیازی نوێکردنەوەی گرێبەستەکەی لەگەڵ پاریس سانجێرمان نییە و ئەم یانەیەش ئامادە نییە لە کۆتایی وەرزی داهاتوودا وەکو یاریزانێکی ئازاد لەدەستی بدات و چاوی لەوەیە لەم گواستنەوەیەدا بیفرۆشێت.
رۆدریگۆ لە چاوپێکەوتنێکدا لەگەڵ مارکا و لە وەڵامی پرسیارێکدا سەبارەت بە پەیوەندیکردنی ئێمباپێ بۆ ریاڵ، رایگەیاند:
ئێمباپێ؟ لە ڕیاڵ مەدرید هەموو شتێک ئاڵۆزە. هەمیشە دەنگۆ هەیە و ئەمساڵ دەنگۆی هاری کەین هەبوو. کاتێک پەیوەندیم بە ریاڵ مەدریدەوە کرد، باس لە ئەگەری پەیوەندیکردنی پۆڵ پۆگبا دەکرا. کەواتە، من هیچ بیرۆکەیەکم لەو بارەیەوە نییە.
هەروەها گوتی:
من هیچ بیرۆکەیەکم نییە، دەبێت چاوەڕێ بکەین و بزانین دۆخەکە چێ لێدێت. بێگومان هیوادارم ئێمباپێ بێت چونکە زۆر هاوکاریمان دەکات. “ئەو ئەستێرەیەکی راستەقینەیە، بەڵام ئێمە لە راستیدا هیچ لەو بارەیەوە نازانین بۆیە پرسیارم لێ مەکەن”.
